Amerika administrasiyası “əl-Qaidə” terror şəbəkəsinin lideri Üsamə bin Ladenin öldürüldüyünə dair çoxsaylı fərziyyələrin irəli sürülməsinə baxmayaraq onun cəsədinin şəkillərini yaymağa hazırlaşmır. Bununla belə, prezident Barak Obama fotoşəkilləri senatorlara göstərməyə hazır olduğunu ifadə edib.
Senatın Daxili Təhlükəsizlik Komitəsinin rəhbəri Co Liberman deyib ki, o və daha bir neçə senator şəkillərə baxmağa hazırdır. C.Liberman israr edir ki, ictimaiyyəti bin Ladenin öldürüldüyünə əmin etmək üçün bundan əvvəl onun cəsədinin şəkillərini yaymaq lazımdır. Xəbərə görə, Senatın Təhlükəsizlik və Kəşfiyyat Komitəsinin üzvləri bin Ladenin cəsədinin şəkillərinə Mərkəzi Kəşfiyyat İdarəsinin (MKİ) xüsusi otağında baxa bilərlər. C.Libermanın həmkarı Cek Rid isə deyib ki, onun şəkillərə baxmağa həvəsi yoxdur, çünki bin Ladenin öldürüldüyünə şübhə etmir.
Elə bin Ladenin uşaqları da atalarının öldürüldüyünə şübhələri yoxdur. İndi onlar Amerikanın bin Ladeni öldürməsini “cinayət” adlandırır və hesab edirlər ki, ABŞ prezidenti Barak Obama buna görə cavab verməlidir. “Əl-Qaidə” liderinin uşaqları beynəlxalq normalar haqda danışaraq islamçı saytlardan birinə deyiblər ki, onların atası heç bir məhkəmə və istintaq aparılmadan öldürülüb. Açıqlamanın müəlliflərindən biri bin Ladenin Ömər adlı oğludur. O, əslən Britaniyadan olan qadınla evlənib və dəfələrlə deyib ki, atasının terrorçu fəaliyyətinə dəstək vermir.
Digər xəbərə görə, bin Ladenin 20 yaşlı oğlu Həmzəni amerikalılar əldən buraxıb. O, “əl-Qaidə” liderinin əsas varisi hesab edilir və uşaq yaşlarından terror düşərgələrində hazırlıq keçib. Həmzənin Pakistanın keçmiş baş naziri Bənazir Bhuttoya qarşı sui-qəsddə əlinin olduğu da bildirilir. O, bin Ladenin qaldığı evdə olub, lakin amerikalılar əməliyyat zamanı nəyə görəsə onu aşkar edə bilməyiblər. Hazırda Həmzənin yeri bilinmir.
Комментариев нет:
Отправить комментарий
Forum